wala pa kasi ako makita
yung habang dini-deliver yung talumpati nya

Talumpati sa Pagtatapos ng Executive Course on National Security – Class 14

MENSAHE NG PASASALAMAT
Vhinz Bathan
NDCP Honor Hall Camp Emilio Aguinaldo, Q.C.
October 9, 2009

NDCP, paano na kaya kung wala ka? Salamat dahil naitatag ka noong dekada ’60.

NDCP, ako’y pahintulutan mong ihambing ka sa isang MALAKING PUNO na pinagtibay at pinagyabong ng panahon. Ikinanlong mo ang isang Ka Vhinz na nagmula sa liblib na lugar sa Lalawigang Tagalog at inilahok mo sa taga-higanteng ABS-CBN. NDCP, salamat sa pagkain sapagkat hindi mo kami ginutom sa limang araw at hindi yan pabubulaanan ng aking mga kasama mula sa Department of Agriculture. Nakakataba ng puso na aming nakasama ang Kagalang-galang na Punong-Bayan ng Santol, La Union at Kahanga-hangang Bise-Alkalde’t anak ng napakagaling at iniidolong barakong Duterte ng Davao City. Kung kaya upang masiguro ang kaligtasan ng lahat ng personalidad ay kalahok din ang iba’t-ibang sangay ng AFP sa pangunguna ng kanilang Spokesman na sa TV lang madalas makita. Idagdag pa natin ang Coast Guard at MARINA. Kasama rin sa tinipon mo ang DepEd, Central Mindanao University, DAR, BJMP, at Pamahalaang Lalawigan ng Antique.

NDCP, bilang pagkilala mo sa mga kapatid na Muslim ay kasama din namin ang Director sa Tanggapan ng Muslim Affairs. Mapalad din kami na nakasama ang taga-DOST at syempre para sa karagdagang pangkapayapaan – ang magigiting na opisyal ng PNP – sa pamumuno ng Hepe ng Legal Service at kung saan ang isa ay nakaklase ko na sa Conflict Management noong 2008 at hinog na para maging Heneral. Siya ay isinilang noong ika- 9 ng Abril 1959 at noong ika-9 ng Disyembre 1954 naman ang kasama naming taga-DOTC na narito rin. Binanggit ko po ang kanilang kapanganakan hindi upang isigaw sa inyo ang kanilang edad bagkus ay upang patunayan na ako’y nagtatanda at hindi madaling makalimot. Kabahagi din ang isang Director sa Senado na kasama kong magpapatunay sa kabaitan ng Air Force. At hindi pwedeng kalimutan ang isang Tausug dahil siya ang RD ng Napolcom at walang tumutol ng sinabi n’yang s’ya ay “Gwapong Tausug.” Kabilang din ang NDCP Registrar, marahil ay upang matiyak na ito’y matatala sa kasaysayan. At ang panghuli bagamat una sa ating listahan, ang taga-Civil Aviation Authority na nagpamalas ng magagandang pananaw at kumiliti sa damdamin ng mga pinuno ng PNP sa Crame. Nawa, sa taong 2010 ay makita natin s’yang tumitindig sa plenaryo bilang Kongresista ng Cebu. Sikapin mong manalo sa 2010 upang ang aking ipinagpalibang hangarin sa darating na halalan ay iyong masimulan, at nawa ay magkasama tayo sa 2013 bilang magkasangga para sa pagbabago ng bulok na sistema sa Kamara.

Kami po ang bumubuo ng ika-14 na ECNS mula Luzon, Visayas hanggang Mindanao. Nagmula sa ibat-ibang tanggapan na may kanya-kanyang kakayahan at kanya-kanyang katangian.

NDCP, sa panahong kami’y ikinanlong mo ay binigyan mo kami ng BUNGA ng KARUNUNGAN. Ibinukas mo sa amin ang pintuan ng pinakamataas ng pag-aaral sa Pambansang Seguridad. Salamat sa pagbibigay ng magagaling at di-mapapantayang Lecturer at Speaker. Salamat sa pagdala sa amin sa General Headquarters upang humarap sa matataas na pinuno ng AFP at PNP. Salamat din at nakapasok kami sa mahigpit na NICA at nakaharap at nakapagtanong sa National Security Adviser.

Salamat sa halos 50 na kasama ko ngayon, salamat sa pagpapaubaya sa maraming pagkakataon sa isang batang tulad ko, salamat sa mga pag-unawa, salamat sa mga pagngiti at pagtawa, salamat sa pagbati ng magandang umaga at pangungumusta.

Tinuturing ko po kayong hindi mga kaklase ko kundi mga magulang at sa iba’y mga nakatatandang kapatid. Sino ba naman ako para isiping ako’y katulad nyo na rin? Gayong alam kong ako’y bubot pa at marami pang lutong bigas na kakainin upang sa pagdating ng panahon ay masabi kong kahit man lang ng inyong kalingkingan ay marating ko din.

Ang pagtindig ko dito sa inyong harapan ay hindi isang karangalan para sa akin dahil ang TUNAY na DANGAL na aking nadarama ay ang NAKASAMA KO KAYO sa Dalubhasaan ng Tanggulang Pambansa ng Pilipinas. Nag-uumapaw ang aking kaligayahan dahil pinagbuklod tayo ng NDCP.

Dumalo ako dito upang matuto at humusay. Ako’y nasa proseso ng patuloy na paglalakbay upang magkaroon ng sapat na karunungan at estratihiya sa pambansang seguridad na maaring magamit sa ibat-ibang aspeto ng ating buhay. Kung di nyo man batid, ako’y natututo at may napupulot na aral sa pakikipagharap at pakikipagtalastasan sa inyo kaya labis-labis ang aking pasasalamat.

Sa pagkakataon din pong ito ay nais kong humingi ng pang-unawa at paumanhin kung meron man akong nasabi, naitanong o nawika sa nakalipas na araw na bahagyang nakasakit, panandalian man o hindi. At lilinawin ko po sa mensaheng ito na sinadya kong hindi lagyan ng exemption ang bumubuo ng Comelec dahil gusto kong makita na ipagtanggol ng anak ang hinahangaan ko at inaasam na sana balang araw ay masundan ko ang yapak ng magaling na Commisioner at buong-diin, hindi po s’ya kasama sa listahan na patungkol sa naitanong kay Chairman Monsod. At ngayon po’y bibitiwan ko sa inyo, “bago ko pa nakilala at nalaman ang galing ng anak, inidolo ko na po ang ama.”

Sa mga dalubhasang namumuno ng NDCP, mula sa Presidente kasama ang kanyang mga Bise-Presidente na narito sa harapan, maraming salamat po sa KARUNUNGAN.

Sa mga kabataang henyo na bumubuo ng DMI sa pangunguna ni Charie Joaquin, salamat po sa inyong pagpupursige at pagpapagod na maibigay sa amin ang pinakamainam at pinakamataas na uri ng pagsasanay at kaalaman.

Sa pagsasabing kami ang “THE BEST CLASS” na ECNS, maraming salamat po.

Sa halos 50 na minamagulang, ate’t kuya ko na po ay baonin natin nawa sa ating paghihiwalay ang KARUNUNGAN mula sa NDCP at kahit maunang mag-retiro ang ilan ay wag sana tayong tumigil sa pagbabahagi ng KARUNUNGAN sa iba lalo’t higit sa kabataan.

Saanman tayo muli pagtagpuin ng pagkakataon ay wag sana nating limutin na tayo’y minsang pinagsama ng NDCP. Tulungan natin ang bayan. Sa panahon ng digmaan o ng kapayapaan, kumilos tayo para sa paniniguro ng Pambansang Seguridad at kapayapaan ng mundo.

Sa mga opisyal ng NDCP, sa bumubuo ng DMI at sa mga kasama ko sa 14th Executive Course on National Security, SUMASALUDO PO AKO SA INYONG LAHAT!

Ako po si Vhinz Bathan, isang Batang NPC at hindi taga-CPP.

MARAMING MARAMING SALAMAT PO!